យុវជនពីរនាក់ស្រវឹងបើករ៉ឺម៉កទៅបុករថយន្តកូរ៉េ របួសធ្ងន់ស្រាល៤នាក់
ភ្នំពេញ៖ កាលពីវេលាម៉ោង១៦និង១៥នាទី ថ្ងៃទី១៧ ខែកុម្ភៈ យុវជនពីរនាក់ស្រវឹងស្រា បើករ៉ឺម៉កយ៉ាងលឿនជ្រុលទៅបុករថយន្តកូរ៉េដែល កំពុងបើកបរបញ្ច្រាសទិសគ្នាពេញទំហឹងស្ថិតតាមបណ្ដោយផ្លូវបេតុង ក្នុងភូមិឬស្សី សង្កាត់ស្ទឹងមានជ័យ ខណ្ឌមានជ័យ បណ្ដាលឲ្យ ស្ត្រីមានផ្ទៃពោះ៥ខែម្នាក់រងរបួសធ្ងន់ធ្ងរ និងបុរស៣នាក់ទៀត រងរបួសធ្ងន់ស្រាល។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេសង្កេតឃើញយុវជនពីរនាក់បានបើករ៉ឺម៉កដឹក ទឹកត្រីក្នុងល្បឿនយ៉ាងលឿនទិសដៅពីត្បូងទៅជើង តាមបណ្ដោយផ្លូវបេតុង លុះមកដល់ចំណុចមុខស្ថានីយប្រេងឥន្ទនៈតេលាស្រាប់តែបុកជាមួយនិង រថយន្តដែលកំពុងបើកបញ្ច្រាសទិសគ្នាពេញទំហឹងបណ្ដាលឲ្យយុវជនទាំងពីរ នាក់ដែលជិះក្នុងរ៉ឺម៉ក ត្រូវដួលបោកក្បាលសន្លប់ស្ដូកស្ដឹងម្នាក់នៅលើរ៉ឺម៉ក និងម្នាក់ទៀតរត់ទៅប្រកាច់ក្នុងស្ថានីយតេលាជិតចំណុចកើតហេតុ ហើយចំណែកឯស្ត្រីម្នាក់ដែលជិះក្នុងរថយន្តជាមួយប្តីនិងមាន ផ្ទៃពោះ៥ខែផងនោះ ត្រូវរថយន្តគាបរងរបួសដៃនិងជើងស្ថិតក្នុងស្ថានភាពធ្ងន់ធ្ងរ បញ្ចូនទៅសង្គ្រោះនៅមន្ទីរពេទ្យភ្លាមៗ និងបុរសជាប្តីដែលជាអ្នកបើកបររថយន្តកូរ៉េ ត្រូវរងរបួសស្រាល។
បន្ទាប់ពីមានហេតុការណ៍នេះ សមត្ថកិច្ចមូលដ្ឋាននិងនគរបាលចរាចរខណ្ឌមានជ័យ បានចុះមកអន្តរាគមន៍សម្របសម្រួលរវាង អូសយករ៉ឺម៉កបង្កហេតុ រួមជាមួយរថយន្តកូរ៉េ យកទៅរក្សាទុកនៅអធិការដ្ឋាននគរបាល ខណ្ឌមានជ័យ ដើម្បីដោះស្រាយតាមផ្លូវច្បាប់។ ហេង នាង
