រថយន្តពីរគ្រឿងបុកគ្នាពេញទំហឹង
ភ្នំពេញ ៖ កាលពីវេលាម៉ោង១និង១៥នាទីយប់រំលងអាធ្រាត្រឈានចូលថ្ងៃទី ១៤ ខែកុម្ភៈ បុរសពីរ នាក់បើករថយន្តបុកគ្នានៅចំណុចផ្លូវលេខ១៩៩កែងនិងផ្លូវលេខ៣២៨ ជិតក្លឹបលុចសារី ស្ថិតក្នុងសង្កាត់ទួលស្វាយព្រៃទី២ ខណ្ឌចំការមន។
សាក្សីនៅកន្លែងកើតហេតុបានឲ្យដឹងថា រថយន្តមួយគ្រឿងម៉ាក ស៊ីវិច ពណ៌ខ្មៅ ពាក់ស្លាកលេខរដ្ឋ36 2-0001 បើកបរដោយបុរសម្នាក់ស្រវឹងស្រា ធ្វើដំណើរតាមបណ្ដោយផ្លូវលេខ៣២៨ ទិសដៅពីជើតទៅត្បូង ក្នុងល្បឿនយ៉ាងលឿន លុះបើកមកដល់ចំណុចផ្លូវកែងបានបុករថយន្តមួយគ្រឿងទៀតម៉ាងPRIUS ពណ៌ ពាក់ស្លាកលេខភ្នំពេញ2V6948 បើកបរដោយបុរសម្នាក់ក្នុងល្បឿនលឿនដូចគ្នានៅលើកំណាត់ផ្លូវលេខ ១៩៩ទិសដៅពីលិចទៅកើតចំពាក់កណ្ដាលតួររថយន្តបណ្ដាលឲ្យខ្ទាត ទៅបោកផ្ទប់និងរទេះលក់ស្លាបមាន់អាំង និងម៉ូតូមួយគ្រឿងទៀតម៉ាកស្មាស ពណ៌ខ្មៅលាយផ្កាឈូក អត់ស្លាកលេខ ដែលចតនៅជាប់និងរទេះលក់សាច់មាន់អាំងនោះបណ្ដាលឲ្យម៉ូតូនិងរទេះ ប៉ើងដូច សំឡី ហើយរថយន្តPRIUS ក៏បានជ្រុលទៅបុករបផ្ទះប្រជាពលរដ្ឋថែមទៀតទើបរថយន្តអស់ល្បឿនទៅ មុខលែងរួច។
ក្រោយពេលកើតហេតុរថយន្តបង្កទាំងពីរគ្រឿងព្រមទាំងរទេះលក់សាច់មាន់ អាំងនិងម៉ូតូត្រូវបានសមត្ថកិច្ចនគរបាលចរាចរជើងគោកចុះធ្វើការ វាស់វែងដកហូតយកទៅរក្សាទុកនៅការិយាល័យជំនាញដើម្បីចាត់ការតាមផ្លូវ ច្បាប់៕ ហេង នាង
