អំពើហិង្សាក្នុងគ្រួសារបន្ទុចបង្អាក់ការអភិវឌ្ឍ
ដោយ វ៉ន សុខាន់
២៧ កុម្ភៈ ២០១២
ភ្នំពេញ៖ សកម្មជនការងារផ្នែកយេនឌ័រមួយរូបបានមានប្រសាសន៍ថា អំពើហិង្សាក្នុងគ្រួសារជាផ្នែកមួយនៃខាតបង់ និងបានបន្ទុច បង្អាក់ការអភិវឌ្ឍគ្រួសារ សង្គម ក៏ដូចជាប្រទេសជាតិទាំងមូលដែរ។
ថ្លែងនៅក្នុងកិច្ចសម្ភាសន៍មូយតាមរយៈទូរស័ព្ទ លោកស្រី រស់ សុភាព នាយិកាប្រតិបត្តិប្រចាំអង្គការយេនឌ័រនិងអភិវឌ្ឍន៍ដើម្បីកម្ពុជា (GAD/C) បានបញ្ជាក់ថា ការប្រើប្រាស់អំពើហិង្សាក្នុងគ្រួសារគឺបានផ្តល់ផលវិបាកជាច្រើនដល់សមាជិកគ្រួសារ និងសង្គមជាតិ ដែលពលរដ្ឋគ្រប់ៗគ្នាត្រូវតែចៀសវាង។
លោកស្រីបានលើកឧទាហរណ៍ថា ក្នុងករណីដែលអំពើហិង្សាបង្ករឲ្យមានរបួសស្នាមដល់សមាជិកក្នុងគ្រួសារ ដូចជាប្រពន្ធ ប្តី ឬក៏កូនៗ ជាដើម នោះពួកគេនឹងមានកាឈឺចាប់ ហើយត្រូវខាតបង់ថវិកា ដោយសារតែត្រូវចំណាយលើការព្យាបាល។
លោកស្រីបន្តថា អំពើហិង្សាក្នុងគ្រួសារខ្លះអាចធ្វើឲ្យជនរងគ្រោះក្លាយទៅជាជនពិការ ហើយក៏អាចឈានទៅដល់បាត់បង់អាយុជីវិត ហើយអ្នកបង្ករត្រូវជាប់ទោស ឬក៏រត់ចោលស្រុក ដែលបញ្ហានេះបានធ្វើឲ្យគ្រួសារបាត់បង់សមាជិក និងបាត់បង់កំលាំងពលកម្ម ។
លោកស្រីបានអះអាងថា ជាងនេះទៅទៀត ក្មេងដែលជាកូនៗនៅក្នុងគ្រួសារប្រើអំពើហិង្សានោះបានខកខានមិនបានទៅសាលាព្រោះរ ដោយសារតែនៅជួយមើលថែម្តាយ ឬសមាជិកគ្រួសារដែលរងរបួសពីអំពើហិង្សានោះ ហើយថា ក្នុងករណីខ្លះក្មេងគេចវេសពីការសិក្សាទៅសេពគប់មិតភក្តិមិនល្អ ហើយងាយប្រឈមនឹងការកេងប្រវញ្ចកម្លាំងពលកម្ម ងាយចាញ់បោកគេ ក្លាយជាក្មេងអនាថា ក្មេងទំនើង ប្រើបា្រស់គ្រឿងញៀនដែលសង្គមកំពុងស្អប់ខ្ពើម។
ជាទូទៅ កាលណាបើសង្គមពោរពេញទៅដោយអំពើហិង្សាក្នុងគ្រួសារ ក្មេងអនាថា ក្មេងទំនើង ការប្រើប្រាស់គ្រឿងញៀន នោះវាជាបញ្ហាស្មុគ្រស្មាញ ដែលនាំឲ្យសង្គមមានភាពច្របូកច្របល់ រញែរញៃ អសន្តិសុខនិងគ្មានសណ្តាប់ធ្នាប់។
ទាក់ទិននឹងចំណុចនេះ លោកស្រី រស់ សុភាព បានរំលឹកថា «រាល់អំពើហិង្សាដែលកើតមានឡើង រដ្ឋាភិបាលគឺជាអ្នកទទួលខុសត្រូវ» ព្រោះថា រដ្ឋាភិបាលមានតួរនាទីលើកស្ទួយវប្បធម៌ និង យកចិត្តទុកដាក់ពីបញ្ហាកាត់បន្ថយ និងទប់ស្កាត់អំពើហិង្សាក្នុងគ្រួសារ។
លោកស្រីបានស្នើឲ្យរាជរដ្ឋាភិបាល អង្គការសង្គមស៊ីវិល ស្ថាប័នដែលពាក់ព័ន្ធទាំងអស់មានការអនុវត្តយុទ្ធសាស្ត្រនារីរតនៈទី៣របស់ក្រសួងកិច្ចការនារី ដើម្បីចូលរួមលប់បំបាត់អំពើហិង្សាក្នុងគ្រួសា ហើយជម្រុញឱ្យច្បាប់គោលនយោបាយ ឱ្យឆ្លើយតបនឹងយេនឌ័រ និងធានាឱ្យមានវិធានការផ្លូវច្បាប់សមស្របក្នុងការទប់ស្កាត់រាល់ទម្រង់នៃការរើសអើងលើស្ត្រី និងការកេងប្រវ័ញ្ចកម្លាំងពលកម្ម។
ក្នុងអង្គសន្និបាតបូកសរុបលទ្ធផលការងារប្រចំាឆ្នំា២០១១ និងលើកទិសដៅឆ្នំា ២០១២ របស់គណៈកម្មាធិការជាតិលើកកម្ពស់សីលធម៌សង្គមនៅឯសណ្ឋាគារភ្នំពេញកាលពីថ្ងៃទី ៩ កុម្ភៈ ឆ្នាំ ២០១២ លោកជំទាវ អ៊ឹង កន្ថាផាវី រដ្ឋមន្ដ្រីក្រសួងកិច្ចការនារី ក៏បានបញ្ជាក់ដែរថា ការទប់ស្កាត់អំពើហិង្សាក្នុងគ្រួសារ គឺជាគោលនយោបាយកាត់បន្ថយភាពក្រីក្រ ហើយអាចធ្វើឲ្យសម្រេចបាននូវវិធានការច្បាប់ ការទទួលបាននូវយុត្ដិធម៌ដល់ពលរដ្ឋដែលងាយរងគ្រោះ។
លោកជំទាវបានបញ្ជាក់ថា ដើម្បីឲ្យប្រជាជនរស់នៅមានសុវត្ថិភាពក្នុង សង្គមមួយមានសន្ដិសុខ សណ្ដាប់ធ្នាប់ មានសីលធម៌ សេចក្ដី ថ្លៃថ្នូរ និងមានការគោរពសិទ្ធិគ្នាទៅវិញទៅមកនោះ ការទប់ស្កាត់អំពើហិង្សាក្នុងគ្រួសារគឺជាការចាំបាច់ដែលត្រូវធ្វើ៕
