ជិះម៉ូតូជ្រុលចង្កូតទៅបុកគេ ពីក្រោយរបួសធ្ងន់ខ្លួនឯង
ភ្នំពេញ៖ កាលពីវេលាម៉ោង៩និង៥០នាទី ព្រឹកថ្ងៃទី១០ ខែកុម្ភៈ នារីម្នាក់ ខណៈកំពុងជិះម៉ូតូសុខៗ ស្រាប់តែមានអាការៈវិលមុខ ក៏ជ្រុលចង្កូតទៅបុកគេ ពីក្រោយរបួសធ្ងន់ ខ្លួនឯង ស្ថិតនៅទល់មុខ វិទ្យាល័យជម្ពូវ័ន្ត សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
សាក្សីនៅកន្លែង កើតហេតុបាន ឲ្យដឹងថា ជនរងគ្រោះមានឈ្មោះ ចន្រ្ទា អាយុ១៩ឆ្នាំ មានមុខរបរជាអាជីវករ លក់ដូរនៅផ្សារ ស៊ិនជូរីផ្លាហ្សា ជិះម៉ូតូមួយគ្រឿង ម៉ាកស្កូបពីពណ៌ស ពាក់ស្លាកលេខ ភ្នំពេញ 1BR-4633 បើកបរក្នុងទិសពី លិចទៅកើត បុកគេពីក្រោយសន្លប់ស្តូកស្តឹង ខ្លួនឯងត្រូវបានគេដឹកបញ្ជូន ទៅសង្គ្រោះនៅមន្ទីរកាល់ម៉ែត ។ ចំណែកឯម៉ូតូ ដែលជនរងគ្រោះជិះបុកនោះ ពុំត្រូវបានគេស្គាល់ម៉ាកនោះទេ ហើយពុំបានរករឿងផងដែរ។
បច្ចុប្បន្ន ម៉ូតូត្រូវនគរបាលយកទៅរក្សាទុក នៅម៉ូតូនគរបាលចោមចៅ ជាបណ្តោះអាសន្ន ដើម្បីដោះស្រាយបន្តទៀត៕ ហេង នាង
