សមាជិកសភាអូស្ត្រាលីឡើងតុលាការនៅក្រុងមែលប៊ិនថ្ងៃនេះ
លោក Craig Thomson អតីតសមាជិកសភាគណបក្សLabor តែក្រោយមក បានដកខ្លួនចេញពីគណបក្សនេះ ទៅធ្វើសមាជិកសភាឯករាជ បានបង្ហាញខ្លួននៅតុលាការក្រុងមែលប៊ិន ដើម្បីប្រឈមមុខនឹងបទចោទកេងបន្លំចំនួន១៥០ប្រការ។
ប៉ូលិសបានចាប់ខ្លួនលោក Craig Thomson កាលពីអាទិត្យមុន ក្រោយពីមានការស៊ើបអង្កេតអស់ពេលយ៉ាងយូរពីសំណាក់ប៉ូលិស ពាក់ព័ន្ធនឹងការចោទប្រកាន់ថាលោកបានប្រើថវិកាសហជីពដោយខុសបែបបទ។
លោកនិយាយថា លោកមិនបានប្រព្រឹត្តខុសទេ ហើយថាលោកនឹងធ្វើការតតាំងចំពោះបទប្រកាន់ទាំងនោះ។
លោក ថ្លែងថា លោកឡើងតុលាការថ្ងៃនេះ ក្នុងគោលបំណងចម្បងគឺដើម្បីព្យាយាមយកបញ្ហានេះមកដោះស្រាយឲ្យចប់ សព្វគ្រប់ ឲ្យបានឆាប់ទៅតាមលទ្ធភាព ដែលអាចធ្វើបាន ដើម្បីសម្អាតឈ្មោះរបស់លោក៕ (Radio Australia)