ឥណ្ឌូណេស៊ីចាប់ឃុំខ្លួនតារាសម្តែងមួយក្រុម និងអ្នកនយោបាយម្នាក់ពីបទប្រើប្រាស់ថ្នាំញៀន
ប៉ូលិសឥណ្ឌូណេស៊ីបានចាប់ឃុំខ្លួនក្រុមតារាសម្តែងដែលមានប្រជាប្រិយភាព មួយក្រុម និងអ្នកនយោបាយមួយរូបពីបទចោទប្រកាន់ថា បានប្រើប្រាស់ថ្នាំញៀននៅក្នុងពិធីជប់លៀងជាលក្ខណៈឯកជនមួយ។
អ្នកនាំពាក្យឲ្យ ទីភ្នាក់ងារជាតិប្រឆាំងគ្រឿងញៀនឥណ្ឌូណេស៊ីបានឲ្យដឹងថា មន្ត្រីមានសមត្ថកិច្ចបានរកឃើញនូវថ្នាំញៀនប្រភេទ ecstasy និងកញ្ឆានៅក្នុងគេហដ្ឋានរបស់លោក Raffi Ahmad ជាតារាភាពយន្ត និងជាអ្នកចំរៀងឥណ្ឌូណេស៊ី។
ប៉ូលិសបានចុះប្រតិបត្តិការ ត្រួតពិនិត្យដោយធ្វើការលុកឆ្មក់មិនឲ្យដឹងជាមុននៅគេហដ្ឋាន របស់តារាសម្ដែងរូបនោះនៅភាគខាងត្បូងទីក្រុងហ្សាការតា ហើយប៉ូលិសបានចាប់ឃុំមនុស្សចំនួន ១៧នាក់។
គេបានដឹងថា នៅក្នុងចំណោមជនដែលត្រូវបានប៉ូលិសចាប់ខ្លួននេះរួមមានតារា សម្តែងចំនួន ៣រូបផ្សេងទៀត និងមានអ្នកនយោបាយមួយរូបដែលជាអតីតតារាបង្ហាញម៉ូដផងដែរ។
ប៉ូលិស បានឲ្យដឹងថា ជនសង្ស័យទាំងអស់នេះកំពុងត្រូវបានសួរចម្លើយ និងយកទឹកមូត្រទៅពិនិត្យដើម្បីរកភស្តុតាងបញ្ជាក់ការប្រើប្រាស់គ្រឿងញៀន៕ (Radio Australia)