យុវជន ៤នាក់ស្រវឹង ជិះម៉ូតូបុករថយន្តកុងតឺន័រ របួសធ្ងន់ទាំងអស់
ភ្នំពេញ៖ កាលពីវេលាម៉ោ២០និង៣០នាទីថ្ងៃទី២៤ ខែមករា យុវជន៤នាក់ ស្រវឹង ជិះម៉ូតូទៅបុកជាមួយនឹងរថយនកុងតឺន័រ បណ្តាលឲ្យអ្នកជិះ ម៉ូតូទាំង៤នាក់ រងរបួសធ្ងន់ធ្ងរ ស្ថិតនៅតាមបណ្តោយ ផ្លូវជាតិលេខ៣ ក្នុងភូមិ ព្រៃព្រីងខាងត្បូង សង្កាត់ចោមចៅ ខណ្ឌពោធិ៍សែនជ័យ។
សាក្សីនៅកន្លែង កើតហេតុបានឲ្យដឹងថា រថយន្តកុងតឺន័រដែលម៉ូតូបុកម៉ាកហ៊ីណូ ពណ៌ខៀវ ពាក់ស្លាកលេខភ្នំ ពេញ3A-1735 អ្នកបើកបរពុំត្រូវបាន គេស្គាល់ ឈ្មោះនោះទេ ។ រីឯម៉ូតូដែលបុករថយន្តនោះម៉ាកវីវ៉ា ពណ៌ខ្មៅ ពាក់ស្លាកលេខកំពង់ធំ 1A-0294 បើកបរដោយឈ្មោះ ធារ៉ា ភេទប្រុស អាយុ២៥ឆ្នាំ មុខរបរជា ជាងរថយន្តស្នាក់នៅក្នុងភូមិព្រៃព្រីងខាងត្បូង ។
សាក្សីបានបន្តថា មុនពេលកើតហេតុគេឃើញម៉ូតូមួយគ្រឿងជិះគ្នា៤នាក់ ក្នុងទិសដៅពីត្បូងមកជើងក្នុងស្ថានភាពស្រវឹងជោគជាំ លុះមកដល់ចំណុច កើតហេតុ រថយន្ត កុងតឺន័រមួយគ្រឿងបានបើកចេញពីហ្គារ៉ាសជួសជុល ក្នុងទិសដៅពីកើតមកលិច ហើយក៏បានប៉ះជាមួយ និងម៉ូតូបណ្តាល ឲ្យអ្នកជិះម៉ូតូទាំង ៤នាក់រងរបួសធ្ងន់សន្លប់ស្តូកស្តឹងត្រូវបានរថយន្តសង្គ្រោះដឹកយកទៅសង្គ្រោះនៅមន្ទីរពេទ្យរុស្ស៊ី ចំណែកឯរថយន្តនិងម៉ូតូត្រូវ នគរបាលចរាចផ្លូវគោក រាជធានីយកទៅរក្សាទុករង់ចាំដោះស្រាយគ្នាជាក្រោយ៕
ដោយ៖ ហេង នាង
