ទីក្រុងម៉ូស្គូបរិហារ “គំនិតមមៃ” ដែលចង់តែទម្លាក់រូបលោកអាសាដ
ការបរិហារនេះ ត្រូវបានលើកឡើង ដោយលោកប្រមុខការទូតរុស្ស៊ី Serguei Lavrov ក្នុងសន្និសីទកាសែតរសៀលម្សិលមិញ ទាំងសង្កត់ធ្ងន់ថា មកពី “គំនិតមមៃ” បែបនេះ ដែលជម្លោះនៅស៊ីរី មិនអាចដោះស្រាយតាមផ្លូវនយោបាយទៅកើត។ សន្និសីទកាសែតបែបនេះ តែងត្រូវគាត់ធ្វើជាប្រពៃណីទៅហើយ រៀង រាល់តែខែមករា ក្នុងក្រសួងការបរទេសផ្ទាល់ ដើម្បីបូកសរុបតុល្យាការ នៃនយោ បាយក្រៅប្រទេសរុស្ស៊ី ក្នុងឆ្នាំកន្លងទៅ។
ទាក់ទងនឹងស្ថានការណ៍នៅស៊ីរី ដោយឆ្លើយតបនឹងសំនួរមួយរបស់អ្នកកាសែត លោករដ្ឋមន្ត្រីការបរទេសរុស្ស៊ី Serguei Lavrov សង្កត់ធ្ងន់ថា ៖ មកពី “គំនិតមមៃ” គ្មានឈប់ ចិញ្ចឹមទុកដោយភាគីប្រឆាំង និងពួកឧទ្ទាមនៅស៊ីរី ដែលមានបស្ចិមលោក និងប្រទេសអារ៉ាប់មួយចំនួន នៅពីក្រោយខ្នង ចង់តែផ្តួលលោកប្រធានាធិបតី អាសាដ បានជាសង្គ្រាមបង្ហូរឈាម នៅស៊ីរី ចេះតែបន្តឆាបឆេះគ្មានទីបញ្ចប់។ តាមដែលប្រមុខការទូតរុស្ស៊ីថ្លែងអះអាង ការទម្លាក់រូបលោកអាសាដ គឺជារឿងដែល “មិនអាចធ្វើទៅកើតសោះឡើយ”។
លោក Lavrov រំលឹកជាថ្មីពី គោលជំហរខុសគ្នា រវាង ម្ខាង គឺពួកឧទ្ទាមនៅស៊ីរី ដែលគាំទ្រដោយបស្ចិមលោក និងប្រទេសអារ៉ាប់មួយចំនួន ដែលរឹងរូសចង់តែផ្តួលលោកអាសាដ ហើយបន្តធ្វើសង្គ្រាម មិនខ្ចីរកផ្លូវដោះស្រាយអធិករណ៍ ដោយវិធីការទូតនិងនយោបាយឡើយ និងម្ខាងទៀត គឺរុស្ស៊ីដែលជាសម្ព័ន្ធមិត្តមួយរបស់ស៊ីរី ព្រមទាំងចិន និង អ៊ីរ៉ង់ ដែលខំអន្ទង រាល់ភាគីបដិបក្ខនៅស៊ីរី ឲ្យចរចាគ្នា ដោះស្រាយវិបត្តិរ៉ាំរ៉ៃក្នុងប្រទេសនេះ ដោយខ្លួនគេ ផ្ទាល់ទៅ ដោយគ្មានការលូកដៃជ្រៀតជ្រែកពីក្រៅ។
គួរនិយាយថា រសៀលម្សិលមិញដែរ ទាក់ទងនឹងស្ថានការណ៍នៅស៊ីរី ពេលទទួលជួប លោកប្រធានាធិបតីលីបង់ Michel Sleimane ដែលមកកាន់ក្រុងម៉ូស្គូ ដើម្បីពឹងពាក់រុស្ស៊ី ឲ្យជួយដោះស្រាយ បញ្ហាជនភៀសខ្លួនស៊ីរី លោកប្រមុខរដ្ឋរុស្ស៊ីពូទីន បានសន្យាផ្តល់ជំនួយហិរញ្ញវត្ថុ និងជំនួយមនុស្សធម៌ សព្វបែប យ៉ាង ដល់ប្រទេសលីបង់ ដែលមកទល់ឥឡូវបានទទួល ឲ្យជ្រកកោន ជនភៀស ខ្លួនស៊ីរីប្រមាណ ២០០.០០០នាក់ហើយ។ លោកពូទីន ថែមទាំងស្នើឲ្យយកក្រុងម៉ូស្គូ ធ្វើជាទីប្រជុំនៃ “សន្និសីទអន្តរជាតិខាងបញ្ហាជនភៀសខ្លួនដែលរត់ចេញពីស៊ីរី” ដោយលំអិតថា រុស្ស៊ីត្រៀមចាត់ចែងឡើងជា សន្និសីទអន្តរជាតិបែបនេះ។
ក្នុងកិច្ចជួបប្រាស្រ័យនោះ ទីក្រុង Beyrouth បានឲ្យដឹងថា ខ្លួនត្រូវការទឹកប្រាក់ប្រមាណ ៣៦៣លានដុល្លារ សម្រាប់ប្រឈមនឹងចរន្តជនភៀសខ្លួនពីស៊ីរី។
តាមតួលេខ អ.ស.ប. ក្នុងសង្គ្រាម២២ខែកន្លងទៅនៅស៊ីរី មានអ្នកស្រុកប្រ ទេសនេះដល់ទៅ ៦៥០.០០០នាក់ បានភៀសខ្លួនទៅជ្រកកោន នៅតាមប្រទសជិតខាង និងមាន បណ្តាជន ធ្លាក់ខ្លួនស្លាប់ អស់ជាង ៦០.០០០នាក់ទៅហើយ៕ដោយ កែវ ឆាយា (RFI)
