អង្គការសហប្រជាជាតិនឹងដាក់ទណ្ឌកម្មលើទីភ្នាក់ងារអវកាសកូរ៉េខាងជើង
នៅសប្តាហ៍នេះ ក្រុមប្រឹក្សាសន្តិសុខអង្គការសហប្រជាជាតិ នឹងបោះឆ្នោតលើសេចក្តីសំរេចចិត្តមួយ ដើម្បីដាក់ទណ្ឌកម្មលើទីភ្នាក់ងារអវកាសកូរ៉េខាងជើង និងអង្គការរដ្ឋាភិបាលកូរ៉េខាងជើងមួយចំនួនទៀត ចំពោះទង្វើនៃការបាញ់ បង្ហោះផ្កាយរណប កាលពីថ្ងៃទី ១២ ធ្នូកន្លងមក។ យោងតាមអ្នកការទូតមួយរូប សេចក្តីសំរេចចិត្តនេះនឹងដាក់ទោស លើការការបាញ់បង្ហោះផ្កាយរណប ព្រមទាំងទាមទារអោយក្រុមប្រឹក្សាសន្តិសុខ ធ្វើការបង្ខំប្រទេសកូរ៉េខាងជើង សារជាថ្មីម្តងទៀត អោយបោះបង់ចោលកម្មវិធីនុយក្លែអ៊ែរយោធារបស់ខ្លួន ព្រមទាំងលែងធ្វើការបង្ហោះមីស៊ីលតទៅទៀត។ គួររំលឹកថា ការសាកល្បងបង្ហោះផ្កាយរណបរបស់កូរ៉េខាងជើង កាលពីខែធ្នូ កន្លងមក បានរងការថ្កោលទោស ពីសំណាក់ក្រុមប្រឹក្សាសន្តិសុខអង្គការសហប្រជាជាតិ ដែលបានចាត់ទុក ការសាកល្បងនេះ ថាជាការគំរាមកំហែងសន្តិភាពអន្តរទ្វីប។
ប្រទេសសមាជិកទាំង ១៥ នៃក្រុមប្រឹក្សាសន្តិសុខអង្គការសហប្រជាជាតិ អាចនឹងអនុម័តជាឯកច្ឆន្ទ នូវសេចក្តីសំរេចចិត្តនេះ នៅថ្ងៃពុធស្អែកនេះហើយ។ ក្រុមប្រឹក្សាសន្តិសុខអង្គការសហប្រជាជាតិ នឹងដាក់ទណ្ឌកម្មថ្មីបន្ថែមទៀត ដល់សហគ្រាស និងអង្គការរដ្ឋាភិបាលកូរ៉េខាងជើងមួយចំនួន ក្នុងនោះមានទីភ្នាក់ងារអវកាសដែលទទួលខុសត្រូវ ក្នុងការការបាញ់បង្ហោះផ្កាយរណបកន្លងមក និងបុគ្គលច្រើនរូបទៀត។
លើសពីនេះ សេចក្តីសំរេចចិត្តរបស់អង្គការសហប្រជាជាតិ នឹងហាមឃាត់មិនអោយមានការបញ្ជូនបច្ចេកទេសនុយក្លេអ៊ែរ និងមីស៊ីលអន្តរទ្វីប ទៅកាន់ក្រុងព្យុងយ៉ាងឡើយ។
គួររំលឹកថា ការសាកល្បងបង្ហោះផ្កាយរណបរបស់កូរ៉េខាងជើង កាលពីខែធ្នូកន្លងមក បានធ្វើអោយអាមេរិក និងប្រទេសសម្ព័ន្ធមិត្ត ព្រមទាំងក្រុមប្រឹក្សាសន្តិសុខអង្គការសហប្រជាជាតិ ថ្កោលទោសថា ជាការលាបតាក់តែងមុខមាត់ ដើម្បីសាកល្បងមីស៊ីល បាលីស្ទីក ដែលជាការគំរាមកំហែងសន្តិសុខអន្តរទ្វីប។
កាលពីថ្ងៃចន្ទនេះ សហរដ្ឋអាមេរិកបានបញ្ជូនគំរោងនៃសេចក្តីសំរេចចិត្តនេះ ទៅប្រទេសជាសមាជិក ក្រុមប្រឹក្សាសន្តិសុខអង្គការសហប្រជាជាតិ ចំនួន១៤ ទៀត។ គំរោងនៃសេចក្តីសំរេចចិត្តនេះ ជាផ្លែផ្កានៃកិច្ចចរចារវាងក្រុង Washington និងក្រុង Pékin ដែលបានប្តូរឥរិយាបថ របស់ខ្លួន។ សូមរំលឹកថា កាលដំបូងឡើយ ប្រទេសចិនបានជំទាស់ មិនឲ្យក្រុមប្រឹក្សាសន្តិសុខដាក់ទណ្ឌកម្មរបបដឹកនាំក្រុងព្យុងយ៉ាង ទេ។
អាមេរិក និងចិន ចង់អោយការអនុម័តសេចក្តីសំរេចចិត្តនេះ សំរេចបានមុននឹងកូរ៉េខាងត្បូងចូលកាន់តំណែង ជាប្រធានក្រុមប្រឹក្សាសន្តិសុខអង្គការសហប្រជាជាតិ នាដើមខែកុម្ភៈ ខាងមុខនេះ។ ក្នុងរយៈពេលកន្លងមក ការបរាជ័យក្នុងការបាញ់បង្ហោះកាំជ្រួចមីស៊ីល និងការសាក ល្បងនុយក្លេអ៊ែរពីរលើក របស់កូរ៉េខាងជើង បានធ្វើអោយក្រុងព្យុងយ៉ាងទទួលទណ្ឌកម្មយ៉ាងច្រើន ពីសំណាក់អង្គការសហប្រជាជាតិ៕ដោយ ព្រំ សឿន សូលីណា (Radio Australia)