បុរសម្នាក់ជិះម៉ូតូទៅម៉ូតូបុករ៉ឺម៉កដឹកស្មៅរងរបួសធ្ងន់
ភ្នំពេញ ៖ នៅវេលាម៉ោង៥និង៤០ នាទីព្រលឹមអុរ ថ្ងៃទី១៩ ខែមករា បុរសម្នាក់ជិះម៉ូតូយ៉ាងលឿនហើយជ្រុលទៅបុករ៉ឺម៉កដឹកស្មៅគោបណ្ដាលឱ្យដួល សន្លប់ឈឹងហូរឈាមតាមត្រចៀក ។ ចំណែកអ្នកបើករ៉ឺម៉ក ម៉ូតូរងគ្រោះបាក់ជើង ស្ថិតនៅចំណុចផ្លូវ២១៧ ភូមិសំបួរ ក្បែរ ទីតាំងឧស្សាហកម្មស័ង្កសីថាយហេង សង្កាត់-ខណ្ឌដង្កោ។
ជនរងគ្រោះអ្នកបើករ៉ឺម៉កម៉ូតូម៉ាកសេ១០កូរ៉េ ពណ៌ កាប់ស្ដាំង គ្មានស្លាកលេខ មាន ឈ្មោះកាំង ថន ភេទប្រុស អាយុ៤០ឆ្នាំ មានទីលំនៅភូមិត្រញំងគៀប ឃុំត្រញំង ក្រសាំង ស្រុកបាទី ខេត្ដតាកែវ ។ ចំណែកជនរង គ្រោះម្នាក់ទៀតពុំស្គាល់អត្ដសញ្ញាណរងរបួសធ្ងន់ធ្ងរបំផុតហូរឈាម តាមត្រចៀកជិះម៉ូតូម៉ាកហុងដាឌ្រីមសេ១២៥ ពណ៌ ខ្មៅគ្មានស្លាកលេខ។
ប្រភពពីសាក្សីនៅកន្លែងកើតហេតុ បានឱ្យដឹងថា មុនពេលកើតហេតុគេបាន ឃើញជនរងគ្រោះភាគីម៉ូតូហុងដាឌ្រីម នោះបើកមកពីត្បូងយ៉ាងលឿន លុះមក ដល់ចំណុចកើតហេតុគេឃើញជនរង គ្រោះនោះគេចជង្ហុកក៏ជ្រុលទៅបុករ៉ឺម៉កម៉ូតូមកពីជើងពេញទំហឹងតែ ម្ដងបណ្ដាលឱ្យដួលបោកក្បាល របួសធ្ងន់ចំណែក ម្ចាស់រ៉ឺម៉កម៉ូតូវិញទំនងជាអាចបាក់ជើង។ ភ្លាមនោះសមត្ថ កិច្ចនគរបាលចរាចរខណ្ឌក៏បានចុះទៅ ដល់កន្លែងកើតហេតុភ្លាមៗ ហើយបានធ្វើការវាស់វែងនិងបាន សន្និដ្ឋានថាភាគីជនរងគ្រោះម៉ូតូហុងដាឌ្រីមនោះ ទំនងជាស្រវឹងសល់ពីយប់ទើបបើកបរ លឿនដូចហោះជ្រុលទៅបុករ៉ឺម៉កម៉ូតូខាងស្ដាំដៃ ។
ក្រោយកើតហេតុជនរងត្រូវបានដឹកយកទៅសង្គ្រោះនៅមន្ទីរពេទ្យមិត្ដភាព ខ្មែរ-សូវៀត ។ ចំណែកម៉ូតូទាំង២គ្រឿង នោះយកទៅរក្សាទុកនៅអធិការដ្ឋាននគរបាលខណ្ឌដង្កោរង់ចាំភាគីទាំង២ ដោះស្រាយគ្នាតាមច្បាប់នៅពេលក្រោយ ៕
ដោយ៖ ហេង នាង
