Freedom House ទិតៀន លោកអូបាម៉ា ដែលទន់ជ្រាយ ចំពោះរុស្ស៊ី
អង្គការក្រៅរដ្ឋាភិបាលអាមេរិកាំង Freedom House ក្នុងរបាយការណ៍ប្រចាំឆ្នាំ ដែលទើបចេញផ្សាយចោទរដ្ឋបាលលោកប្រធានាធិបតីស.រ.អា.បារ៉ាក់អូបាម៉ា ថាអើពើមិនបានដិតដល់ឡើយ ចំពោះការវាយប្រហារ ដំណាក់ថ្មី ពីខាងរដ្ឋរុស្ស៊ី ទៅលើសង្គមស៊ីវិល ក្រោយពីលោកពូទីន ឡើងកាន់អំណាចជាប្រធានាធិបតីវិញ។
ក្នុងរបាយការណ៍នោះ រុស្ស៊ីបន្តស្ថិតនៅក្នុងចំណោម ប្រទេសដែលគ្មានសេរីភាព រួមជាមួយប្រទេសជិតខាងខ្លះ នៃអតីតសហភាពសូវៀត។
Freedom House ចោទសេតវិមាន ក្រុងវ៉ាស៊ីនតោនថា ស្ថិតនៅព្រងើយកន្តើយ ខណៈដែល ពួកអ្នកតស៊ូដើម្បីប្រជាធិបតេយ្យ ដោយប្រាថ្នាសម្រេចឲ្យបាននូវកំណែទម្រង់នយោបាយ តែងរងនូវការតាមដាន ធ្វើទុក្ខធ្វើបាបពីខាងអាជ្ញាធរ ឧទាហរណ៍ក្នុងប្រទេសរុស្ស៊ី។
ជាសក្ខីកម្មថ្មីបំផុត គឺរដ្ឋបាលលោក អូបាម៉ា ស្រាប់តែធ្លាក់ខ្លួន គ្មានសមត្ថភាពទាល់តែសោះ ផ្តល់ជាចម្លើយឲ្យបានស័ក្តសម ពេលដែលបេសក កម្មនៃ “អង្គការអាមេរិកាំងខាងអភិវឌ្ឍន៍អន្តរជាតិ” ហៅកាត់ថា USAID ត្រូវបានរបបលោកពូទីន បញ្ឈប់ឲ្យលែងអាចដំណើរការនៅរុស្ស៊ី ហេតុដែលញ៉ាំងឲ្យកាន់តែទន់ខ្សោយទៅ សង្គមស៊ីវិលនៅរុស្ស៊ី សង្គមដែលស្ថិតនៅស្រាប់ទៅហើយ ក្រោមសម្ពាធយ៉ាងខ្លាំងពីខាងរដ្ឋរុស្ស៊ី។
ដោយលាតត្រដាងទឡ្ហីករណ៍ខ្លួន Freedom House មើលឃើញ ការស្រុតចុះអាក្រក់ទៅ នៃស្ថានការណ៍ខាងសិទ្ធិ និងសេរីភាពមនុស្ស នៅអតីតសហភាពសូវៀត ក្នុង១ឆ្នាំកន្លងទៅ។ ទាក់ទងនឹងប្រទេសរុស្ស៊ី Freedom House លើកឡើងថា “រុស្ស៊ីបានឈានជំហាន មានន័យជា របត់ប្តូរផ្តាច់ ត្រឡប់ទៅកាន់ស្ថានភាពអាក្រក់មែនទែន ក្រោយពីលោកពូទីន ឡើងកាន់អំណាចកំពូល នៅរុស្ស៊ីវិញ។ ឧទាហរណ៍ អំណាចលោកពូទីន បានអនុម័តវិធានការ ដាក់ទណ្ឌកម្មយ៉ាងធ្ងន់ធ្ងរ ទល់នឹងពួកអ្នកចាត់ចែងមីទ្ទិញ ដែលគ្មានសេចក្តីអនុញ្ញាត របស់អាជ្ញាធរ បំបិទលទ្ធភាពមិនឲ្យអង្គការសង្គម រៃអង្គាសប្រាក់សម្រាប់សកម្មភាពខ្លួន។ល។
អំពីអតីតសាធារណរដ្ឋសូវៀតឯទៀត បែបយ៉ាង Kazakhstan Tadjikistan Ukraine ក្នុង១ឆ្នាំ កន្លងទៅ គឺគេបានដើរតាមផ្លូវ កាត់បន្ថយសេរីភាព អស់យ៉ាងច្រើន ចំណែក Azerbaidjan Ouzbekistan Turkmenistan Belarus បន្តស្ថិតនៅក្នុងចំណោមរដ្ឋ ដែលប្រើវិធីគាបសង្កត់ និងបង្ក្រាបខ្លាំងជាងគេ នៅក្នុងលោក។
ក្នុងបញ្ជីនៃ ៤៧ប្រទេស ដែលត្រូវ Freedom House ចាត់ទុកថាគ្មានសេរីភាព មាន៩ប្រទេស ដែលស្ថានការណ៍ខាងសិទ្ធិនយោបាយ និងសិទ្ធិស៊ីវិល បានទទួលពិន្ទុទាបបំផុត បែបយ៉ាង ប្រទេស កូរ៉េខាងជើង Syrie Somalie Soudan Arabie Saoudite Turkmenistan និង Ouzbekistan៕ដោយ កែវ ឆាយា (RFI)