ក្មេងស្ទាវមួយក្រុម បើករថយន្តគេចម៉ូតូ បុកខ្លោងទ្វារសាលាគរុកោសល្យ
ភ្នំពេញ៖ កាលពីវេលាម៉ោង ២៣និង៣០នាទីយប់ ថ្ងៃទី១៧ ខែមករា យុវជនមួយក្រុម ស្ថិតក្នុងស្ថានភាពស្រវឹងបានបើកបររថយន្ត ក្នុងល្បឿនលឿន តាមបណ្ដោយផ្លូវ២៧១ លុះមកដល់ចំណុចមុខសាលាគរុកោសល្យ ក្នុងសង្កាត់ទឹកល្អក់ទី៣ ខណ្ឌទួលគោក គេចពីម៉ូតូឡើងចិញ្ចើមផ្លូវ ហោះផ្លោកបុកកៀបជាប់នឹងសសរខ្លោងទ្វារ សាលាគរុកោសល្យ ។
ជុំវិញគ្រោះថ្នាក់ចរាចរណ៍ ខាងលើនេះ សាក្សីនៅកន្លែងកើតហេតុបានឲ្យដឹងថា មុនពេលកើតហេតុ គេសង្កេតឃើញយុវជន៥-៦នាក់ បានជិះឡានកាមរីឆ្លាមមួយគ្រឿង ពណ៌ទឹកប្រាក់ ពាក់ស្លាកលេខភ្នំពេញ 2K-5163 បើកបរតាមបណ្ដោយផ្លូវ២៧១ ក្នុងទិសដៅពីត្បូងទៅជើង ដោយបានបើកក្នុងល្បឿនយ៉ាងលឿន និងរេចុះរេឡើងពេញផ្លូវ ហាក់បីដូចជាផ្លូវមួយខ្សែនោះ ពួកគេទិញដាច់សម្រាប់បើករថយន្តរបស់ពួកគេអញ្ចឹង ខណៈបើកមកដល់ចំណុចមុខខ្លោងទ្វារសាលាគរុកោសល្យ ស្រាប់តែរថយន្តមួយគ្រឿងនេះ បានរេចង្កូតគេចពីម៉ូតូ មកខាងស្តាំឡើងលើចិញ្ចើម ផ្លូវ បោលក្បាលរថយន្តបុកខ្ទប់នឹងសសរខ្លោងទ្វារ បណ្ដាលឲ្យរថយន្តកៀបក្បាលជាប់នឹងសសរខ្លោងទ្វារ ប៉ុន្តែសំណាងល្អណាស់ ដែលក្នុងហេតុការណ៍នោះ គ្មានអ្នករងរបួស។
បន្ទាប់ពីកើតហេតុ សមត្ថកិច្ចមូលដ្ឋាន និងនគរបាលចរាចរ ខណ្ឌទួលគោក បានចុះមកអន្តរាគមន៍ ធ្វើការវាស់វែងនាំយករថយន្ត បង្កហេតុនេះទៅរក្សាទុកនៅ អធិការដ្ឋាននគរបាលខណ្ឌទួលគោក ដើម្បីដោះស្រាយតាមច្បាប់៕
ដោយ៖ ហេង នាង
