បើករថយន្តជ្រុលចង្កូតទៅបុកម៉ូតូពីក្រោយសន្លប់ ៣នាក់
ភ្នំពេញ៖ កាលពីវេលាម៉ោង២៣និង៣០នាទីយប់ ថ្ងៃទី១៦ ខែមករា រថយន្តមួយគ្រឿង បើកទៅបុកម៉ូតូជិះដោយបុរស៣នាក់ ចំពីក្រោយពេញទំហឹង បណ្តាលឲ្យសន្លប់ នៅកណ្តាលផ្លូវ ស្ថិតនៅតាមបណ្តោយមហាវិថីសហព័ន្ឋរុស្ស៊ី ទល់មុខផ្សាររតនាផ្លាហ្សា ក្នុងសង្កាត់ទឹកថ្លា ខណ្ឌសែនសុខ ហើយបើករត់គេចខ្លួនបាត់។
បុរសរងគ្រោះទាំង៣នាក់ទី១ឈ្មោះឆែម ឈឿន អាយុ៤៥ឆ្នាំ ជាអ្នកបើកម៉ូតូ ទី២ឈ្មោះចាប ចក អាយុ៣៥ឆ្នាំ និងទី៣ឈ្មោះមាស គា អាយុ៣៥ឆ្នាំ ទាំង៣នាក់ជាកម្មករសំណង់ស្នាក់នៅផ្ទះជួលជាមួយគ្នា នៅសង្កាត់ទឹកល្អក់ទី១ ខណ្ឌទួលគោក ។
តាមប្រភពពត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តម៉ាកវីហ្គោ ពណ៌ស្ករ បើកដោយបុរសម្នាក់អាយុប្រហែល៤០ឆ្នាំ តាមមហាវិថីសហព័ន្ឋរស្ស៊ី ក្នុងទិសពីលិចទៅកើតស្រាប់តែមកដល់ចំណុកកើតហេតុ រថយន្តព្យាយាមបើកវ៉ារថយន្តមួយគ្រឿងទៀតដែលនៅពីមុខទើបជ្រុលចង្កូត ទៅបុកម៉ូតូគុបជ្រុង បណ្តាលឲ្យបុរសទាំង៣នាក់ដែរជិះលើម៉ូតូដួលបោកក្បាលទៅនឹងថ្នល់ សន្លប់ស្តូកស្តឹងនៅកណ្តាលផ្លូវ។ ក្រោយពេលដឹងខ្លួនបុរសរងគ្រោះទាំង៣នាក់ត្រូវបានក្រុមគ្រួសារដឹកយកទៅ សង្គ្រោះនៅមន្ទីរពេទ្យ៕
ដោយ៖ ហេង នាង
