ម៉ូតូពីរគ្រឿងបុកគ្នាបណ្តាលឲ្យប្តីប្រពន្ធពីរនាក់រងរបួស
ភ្នំពេញ៖ កាលពីវេលាម៉ោង២៤និង៣០នាទីរំលង អធ្រាត្រ ឈានចូលថ្ងៃទី១៧ ខែមករា ប្តីប្រពន្ធនាក់បានរងរបួសធ្ងន់ ខណៈពេលកំពុងជិះម៉ូតូ ក៏ត្រូវម៉ូតូមួយគ្រឿងទៀតបុកចំពីមុខពេញទំហឹង បណ្ដាលឲ្យបុរសជាប្តីបាក់ជើង ស្ថិតនៅជិតរង្វង់មូលផ្សារដើមថ្កូវ តាមបណ្ដោយ ផ្លូវ៤៨៨ កែងផ្លូវ២៧១ ក្នុងសង្កាត់ផ្សារដើមថ្កូវ ខណ្ឌចំការមន។
សាក្សីនៅកន្លែងកើតហេតុបានឲ្យដឹងថា មុនពេលកើតហេតុប្តីប្រពន្ឋរងគ្រោះខាងលើនេះបានជិះម៉ូតូម៉ាកវីវ៉ា ពណ៌ខ្មៅ តាមបណ្ដោយផ្លូវ៤៨៨ ក្នុងទិសដៅពីកើតទៅលិច ហើយបានបត់ឆ្វេងឡើងទៅផ្លូវ២៧១ ស្រាប់តែត្រូវម៉ូតូម៉ាកហុងដាសេ១១០ ពណ៌ខ្មៅ បើកបរដោយយុវជនម្នាក់ ក្នុងល្បឿនលឿន ជាន់ហ្វ្រាំងមិនទាន់ ក៏បុកចំពីមុខពេញទំហឹង បណ្ដាលឲ្យម៉ូតូទាំង២ដួលប្រាវទៅនិងថ្នល់ បណ្ដាលឲ្យបុរសដែលជាប្តីរងរបួសបាក់ជើងខាងស្តាំ ចំណែកប្រពន្ឋគ្រាន់តែរលាត់ដៃជើងប៉ុណ្ណោះ។
ចំណែកយុវជនជិះម៉ូតូសេ១១០ គ្រាន់តែរងរបួសស្រាល ក្រោយពេលកើតហេតុប៉ូលិសចរាចរណ៍ខណ្ឌចំការមន បានចុះមកវាស់វែង រួចនាំយកម៉ូតូ ទាំង២គ្រឿងទៅរក្សាទុកនៅអធិការដ្ឋានខណ្ឌរងចាំដោះស្រាយជាក្រោយ៕
ដោយ៖ ហេង នាង
