មនុស្សប្រុសស្រី៣នាក់បានរងរបួស ព្រោះរថយន្តបើកបញ្ច្រាស់ផ្លូវទៅបុកម៉ូតូ
ភ្នំពេញ៖ កាលពីវេលាម៉ោង១០និង៥០នាទីយប់ ថ្ងៃទី១៥ ខែមករា មនុស្សប្រុសស្រី៣នាក់បានរងរបួស ព្រោះរថយន្តបើកបញ្ច្រាស់ផ្លូវទៅបុកម៉ូតូ ស្ថិតនៅរង្វង់មូលនាងគង្ហីញ តាមបណ្តោយមហាវិថីព្រះមុនីរ៉េត កែងផ្លូវ២១៧ ក្នុងសង្កាត់វាលវង់ ខណ្ឌ៧មករា ។
ប្រភពព័ត៌មានពីកមន្លែងកើតហេតុបានឲ្យដឹងថា មុនពេលកើតហេតុរថយន្តម៉ាកកាមរីឆ្លាម ពណ៌ទឹកប្រាក់ បើកបរដោយបុរសម្នាក់ តាមបណ្តោយមហាវិថីព្រះមុនីរ៉េត ក្នុងទិសដៅពីលិចទៅកើត បើកបញ្ច្រាស់ផ្លូវ ក៏ទៅបុកចំពីមុខម៉ូតូម៉ាកហុងដា សេ១១០ ជិះគ្នា៣នាក់ ប្រុស២នាក់ និងស្ត្រីម្នាក់ ដែលកំពុងធ្វើចរាចរណ៍ តាមបណ្តោយផ្លូវ២១៧ ក្នុងទិសដៅពីកើតទៅលិចនៅត្រង់ចំណុចផ្លូវបែកជា៤ បណ្តាលឲ្យម៉ូតូដួលប្រាវបោកទៅនិងថ្នល់ រងរបួសធ្ងន់ស្ត្រីម្នាក់ ត្រូវបញ្ជូនទៅសង្គ្រោះបន្ទាន់នៅមន្ទីរពេទ្យតាមរយៈម៉ូតូកង់បី។ ចំណែកបុរស២នាក់ទៀត ដែលជាអ្នកបើកបរម៉ូតូនិងអ្នកជិះកណ្តាល គ្រាន់តែរងរបួសស្រាលតែប៉ុណ្ណោះ។
ក្រោយពេលកើតហេតុរថយន្តបង្ករត់គេចខ្លួនបាត់ រីឯម៉ូតូជនរងគ្រោះត្រូវបានមិត្តភក្តិជួយដឹកយកទៅជួសជុលដោយខ្លួនឯង ៕
ដោយ៖ ហេង នាង
