ជនសង្ស័យមុខសញ្ញាឆក់ម្នាក់ត្រូវសមត្ថកិច្ចតាមចាប់ខ្លួន
ភ្នំពេញ ៖ កាលពីវេលា ម៉ោង០៣និង៤៥នាទី រសៀលថ្ងៃទី១៥ ខែមករា នៅចំណុចភ្លើងស្ដុបផ្សារដីហុយ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ សង្ស័យជាមុខសញ្ញាឆក់ម្នាកខណៈកំពុងជិះម៉ូតូ ពេលឃើញសមត្ថកិច្ច ខំបើកគេចទៅបុករថយន្ត ខ្ទាតជិត ៥ម៉ែត្រ រួចងើបឡើងខំប្រឹងបើកម៉ូតូទាំងខូចរត់គេច ត្រូវនគរបាលចរាចរ ដេញតាមចាប់បាន។
តាមសមត្ថកិច្ចអោយដឹងថា ជនសង្ស័យរូបនេះ មានឈ្មោះ សួង សុគន្ថា ភេទប្រុស អាយុ ២២ឆ្នាំ បានប្រាប់ថា ខ្លួនជានិសិត្យ ភាសាកូរ៉េ បច្ចុប្បន្នមាន ទីលំនៅភូមិព្រៃពពាល សង្កាត់គោករកា ខណ្ឌពោធិ៍សែនជ័យ រាជធានីភ្នំពេញ។ ជិះម៉ូតូស្កុបពី ពណ៌សូកូឡាលាយស ពាកល្លាកលេខ ភ្នំពេញ ១អាកា ៩៤៣១ ។
សមត្ថកិច្ចនគរបាលបញ្ជាក់ថា មុនកើតហេតុជនសង្ស័យ បើកម៉ូតូតែម្នាក់ឯង ពីជើងមកត្បូង រួចឆ្លងស្ដុបក្នុងល្បឿនលឿន ហើយ ពេលឃើញនគរបាលចរាចរ ស្រាប់តែគេចទៅបុករថយន្ដលុច្សស៊ីស ៤៧០ ពណ៌ខ្មៅ កំពុងបត់ស្ដាំ ចូលទៅបុរីពិភពថី្មពេញមួយទំហឹង បណ្ដាលឲ្យ ដួលច្រង៉ាប់ច្រងិល សំណាងល្អបុកចំកង់រថយន្ត បណ្ដាលរថយន្ដកំពិតថ្ពាល់ ខាងស្ដាំបន្ដិចបន្តួច។
ក្រោយកើតហេតុ ជនសង្ស័យរូបនេះ រួមទាំងម៉ូតូត្រូវបានបញ្ជូន ទៅកាន់អធិការដ្ឋានខណ្ឌសែនសុខ ដើម្បីចាត់ការតាមនីតិវិធីច្បាប់៕
ដោយ៖ ហេង នាង
