យោធាឥណ្ឌាព្រមានតដៃធ្ងន់ប្រសិនបើប៉ាគីស្ថានហ៊ានបាញ់
ប្រមុខដឹកនាំយោធាឥណ្ឌាបានចេញបញ្ជា ដល់ពលទាហានទាំងអស់ឱ្យវាយប្រហារតបតវិញ ដោយធ្ងន់ដៃបំផុត ប្រសិនបើទាហានប៉ាគីស្ថានហ៊ានរំលោភបទឈប់បាញ់ នៅតាមព្រំដែន ក្នុងតំបន់ជាប់ជម្លោះ Cachemire។ បទបញ្ជានេះធ្វើឡើងបន្ទាប់ពីទាហានប្រទេសជាប់របងទាំងពីរនេះ បានប៉ះទង្គិចគ្នាដោយអាវុធ រហូតមានស្លាប់ម្ខាងៗអស់ទាហានពីរនាក់។
បទបញ្ជាបានចែងយ៉ាងច្បាស់ អនុញ្ញតឱ្យទាហានឥណ្ឌាបើកប្រតិបត្តិការវាយប្រហារយ៉ាងចាស់ទៅលើ គូបក្ខដិបក្ខ ប្រសិនបើមានឃើញសញ្ញាបង្ករឿងណាមួយពីសំណាក់ប៉ាគីស្ថាន ! នេះបើតាមការគូសបញ្ជាក់ របស់នាយឧត្តមសេនីកងពលនៅទល់ដែន មកកាន់ភ្នាក់ងារសារព័ត៌មានបារាំង AFP មុននឹងផ្តើមជួបពិភាក្សាជាមួយអ្នកទទួលខុសត្រូវយោធា ប៉ាគីស្ថាន-ឥណ្ឌា នៅថ្ងៃចន្ទនេះ នៅទល់ដែន។
ជំនួបប្រជុំដែលរៀបចំឡើងបន្ទាប់ពី មានការប៉ះទង្គិចគ្នារហូតបាត់បង់ជីវិតទាហាន ទាំងសងខាង ៖ ប៉ាគីស្ថាន អះអាងថាមានទាហានពីរនាក់បានស្លាប់ ម្នាក់នៅថ្ងៃទី៦មករា និងម្នាក់ទៀតនៅថ្ងៃព្រហស្បតិ៍មុន។ ចំណែកឥណ្ឌាវិញ ក៏បាត់បង់ជីវិតទាហានពីរនាក់ដែរ ហើយម្នាក់ត្រូវកាត់ក្បាលបាត់ទៀតផង។ ឧប្បវហេតុនេះបានធ្វើមហាអំណាចនុយក្លេអ៊ែរនៅអាស៊ីទាំងពីរ ដែលទើបផ្តើមចរចាសន្តិភាព ធ្លាក់ក្នុងស្ថានភាពតានតឹងដាក់គ្នាជាថ្មី ។
ការចរចាអាចនឹងជួបការលំបាកខ្លាំង ដ្បិតឥណ្ឌា តាមរយៈឧត្តមសេនីយ៍នៅទល់ដែន បានចាត់ទុកទង្វើកាត់ក្បាលមនុស្សរបស់ទាហានប៉ាគីស្ថាន ថាមិនអាចអត់ទោសបានឡើយ និងបង្ខំឱ្យប៉ាគីស្ថានប្រគល់ក្បាលទាហានឥណ្ឌាស្លាប់មកវិញ។ ភរិយាទាហានឥណ្ឌា ក៏បានផ្តើមធ្វើកូដកម្មអត់អាហារ ដើម្បីទាមទារយកសពប្តីទាំងមូលមកធ្វើបុណ្យ ស្របតាមប្រពៃណី និងសក្តិសមជាពលរដ្ឋដែលបានបូជាជីវិតបំរើជាតិ។
សហរដ្ឋអាមេរិក បានអំពាវនាវឱ្យប្រទេសជិតខាងទាំងពីរ បន្ធូរបន្ថយសម្ពាធតានតឹងនៅCachemire ដែលធ្លាប់ជាបុព្វហេតុនៃសង្គ្រាមប៉ាគីស្ថាន-ឥណ្ឌា បីដង គិតចាប់ពីប្រទេសទាំងពីរបានឯករាជ្យនៅឆ្នាំ១៩៤៧៕ដោយ អៀង សុខម៉ិញ (RFI)