រថយន្តដឹកដី បុកគ្នាបណ្តាលឲ្យម្នាក់ស្លាប់ របួសធ្ងន់ម្នាក់
ភ្នំពេញ៖ កាលពីវេលាម៉ោង ប្រហែល១៖៣០នាទី រសៀលថ្ងៃទី១៣ ខែមករា រថយន្តដី ចំនួន២គ្រឿង បានបុកគ្នា បង្កឲ្យមាន ភ្លើងឆាបឆេះ ទៅលើរថយន្តទាំង ពីរគ្រឿង ស្ថិតនៅខាងជើង វត្តឃ្មួញចម្ងាយ១០០ម៉ែត្រ ក្នុងសង្កាត់ឃ្មួញ ខណ្ឌសែនសុខ បណ្តាលឲ្យ មនុស្សបុរសម្នាក់ស្លាប់ និងម្នាក់ទៀតរងរបួសធ្ងន់។
មន្រ្តីនគរបាលចរាចរណ៍ បានឲ្យដឹងថា នៅមុនពេលកើតហេតុ មានរថយន្តបែនដឹកដីម៉ាក HYUNDAI ពណ៌ខៀវ គ្មានស្លាកលេខមួយគ្រឿង បើកបរដោយបុរសម្នាក់ តាមបណ្តោយវិថីហាណូយ ពីទិសខាងត្បូងមក ជើងចេញពីភ្នំពេញ។ លុះមកដល់ចំណុចកើតហេតុខាងលើ បានឡើងជែងរថយន្ត មួយគ្រឿងផ្សេងទៀត ចូលចំណែកផ្លូវ នៃរថយន្តម្ខាងទៀត បណ្តាលឲ្យបុកជាមួយរថយន្តបែនដឹកដីមួយគ្រឿងទៀត ដែលធ្វើដំណើរច្រាស ទិសគ្នា ម៉ាក HYUNDAI ពណ៌ខៀវ ពាក់ស្លាកលេខភ្នំពេញ 3A-3683 បណ្តាលឲ្យឆាបឆេះទាំងសងខាង។
ហេតុការណ៍គ្រោះថ្នាក់ចរាចរនេះ បណ្តាលឲ្យបុរសឈ្មោះ ឆន ឆាយណា អាយុ ៣០ឆ្នាំ រស់នៅភូមិផ្សារអន្លង់ជ្រៃ ឃុំ ប្រាំបីមំ ស្រុកថ្ពង ខេត្តកំពង់ស្ពឺ ស្លាប់ភ្លាមៗនៅកន្លែងកើតហេតុ។ ចំណែកបុរសឈ្មោះ ណេង សុខណាក់ អាយុ ២០ឆ្នាំ មានទីលំនៅភូមិព្រែករំដេង ឃុំពង្រ ស្រុកកោះសូទិន ខេត្តកំពង់ ចាម បានរងរបួសធ្ងន់ត្រូវបានបញ្ជូន ទៅសង្រ្គោះនៅមន្ទីរពេទ្យភ្លាមៗ។
ក្រោយពិនិត្យរួចរាល់ រថយន្តទាំងពីរគ្រឿង ត្រូវបានសមត្ថកិច្ចយកទៅរក្សាទុកនៅការិយាល័យចរាចរណ៍ជើង គោករង់ចាំការដោះស្រាយជាក្រោយ៕
ដោយ៖ ហេង នាង
