ឃាត់ខ្លួនបុរសបីនាក់ ពាក់ព័ន្ធការជួញដូរគ្រឿងញៀន
ភ្នំពេញ៖ កាលពីវេលាម៉ោង ៧ និង ៥០នាទី យប់ថ្ងៃទី៩ ខែមករា ជនសង្ស័យបីនាក់ ត្រូវបានកម្លាំងផ្នែកយុត្តិធម៌ នៃអធិការដ្ឋាននគរបាលខណ្ឌដូនពេញ ឃាត់ខ្លួន ពាក់ព័ន្ធករណីជួញដូរគ្រឿងញៀននៅចំណុចខាងមុខវត្តបុទុម ផ្លូវស៊ូស្រ៊ុន ភូមិ៣ សង្កាត់ចតុមុខ ខណ្ឌដូនពេញ។
ប៉ូលិស ខណ្ឌដូនពេញបានឲ្យដឹងថា ជនសង្ស័យខាងលើ ទី១-ឈ្មោះ ង៉ូយ សុជាតិ អាយុ ២០ឆ្នាំ មុខរបរ និងទីលំនៅមិនពិតប្រាកដ ទី២-ឈ្មោះ ហេង ប៊ុណ្ណា អាយុ ៣២ឆ្នាំ មុខរបរ និងទីលំនៅមិនពិតប្រាកដ និងទី៣-ឈ្មោះ ណូរ ស៊ីនៀត អាយុ ៣១ឆ្នាំ ជាអ្នករត់ម៉ូតូកង់បី ស្នាក់នៅផ្ទះជួល ក្នុងសង្កាត់បឹងកេងកង៣ ខណ្ឌចំការមន។
មុនកើតហេតុ កម្លាំងផ្នែកយុត្តិធម៌ នៃអធិការដ្ឋាននគរបាលខណ្ឌដូនពេញ បានទទួលព័ត៌មានសម្ងាត់ថា មានករណីជួញដូរគ្រឿងញៀននៅចំណុចមុខវត្តបុទុម ផ្លូវស៊ូស្រ៊ុន សង្កាត់ចតុមុខ ខណ្ឌដូនពេញ ពេលនោះកម្លាំងបានចុះទៅដល់កន្លែងកើតហេតុ ឃើញជនសង្ស័យទាំងបីនាក់អង្គុយនៅលើរ៉ឺម៉កកង់បី ដោយមានការសង្ស័យ ក៏ធ្វើការឃាត់ខ្លួនត្រួតពិនិត្យ ឃើញមានគ្រឿងញៀនប្រភេទក្រាម ពណ៌សថ្លា (ម៉ាទឹកកក) ចំនួន ១៧ កញ្ចប់ នៅក្នុងហោប៉ៅរបស់ឈ្មោះ ង៉ូយ សុជាតិ រួចបានធ្វើការឃាត់ខ្លួនទាំងបីនាក់តែម្តង និងបាននាំខ្លួនមកអធិការដ្ឋាននគរបាលខណ្ឌដូនពេញ ដើម្បីសួរនាំ។
បច្ចុប្បន្ន ជនសង្ស័យទាំងបីនាក់ ត្រូវឃាត់ខ្លួនបណ្តោះអាសន្ន នៅអធិការដ្ឋាននគរបាលខណ្ឌដូនពេញ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ៕
