សីតុណ្ហភាពនឹងចុះត្រជាក់ម្តងទៀតនៅថ្ងៃទី១១-១៥មករា
ភ្នំពេញ៖ នៅថ្ងៃទី៩ មករា ២០១៣នេះ លោក ចាន់ យុត្ថា អ្នកនាំពាក្យ និងជានាយកខុទ្ទល័យក្រសួងធនធានទឹក និងឧតុនិយម បាននិយាយថា ព្យុះឈ្មោះសូណាមូ បានរលាយបាត់ទៅហើយ នៅសល់តែសម្ពាធទាប (L) ដែលអាចនឹងធ្វើឲ្យអាកាសធាតុនៅព្រះរាជាណាចក្រកម្ពុជា ចុះត្រជាក់ម្តងទៀត ចាប់ពីថ្ងៃទី១១ ដល់ថ្ងៃទី១៥ ខែមករា ឆ្នាំ២០១៣។
លោក ចាន់ យុត្ថា បានឲ្យដឹងផងដែរថា សីតុណ្ហភាពចុះត្រជាក់លើកនេះ អាចជាលើកចុងក្រោយហើយ សម្រាប់រដូវរំហើយនេះ បើយោងទៅតាមព្យាករណ៍។ អាកាសធាតុត្រជាក់កន្លងទៅនេះ បានចុះដល់កម្រិតពី ១៩ ទៅ ២០ អង្សាសេ។ តែអាកាសធាតុត្រជាក់ដែលនឹងមកដល់ ពីថ្ងៃទី១១ ដល់ថ្ងៃទី១៥ ខែមករា អាចចុះដល់កម្រិត ១៧ ទៅ ១៨ អង្សាសេ នៅតំបន់ភ្នំ។
លោក ចាន់ យុត្ថា បានពន្យល់ថា សីតុណ្ហភាពអប្បបរមាកន្លងទៅនេះ មិនប្រែប្រួលខ្លាំងទេ តែសីតុណ្ហភាពអតិបរមា មានការប្រែប្រួលខ្លាំង គឺពី ៦ ទៅ ៧ អង្សាសេ ក្នុងពេលដែលសីតុណ្ហភាពអប្បបរមា មានការប្រែប្រួលត្រឹមតែពី ១ ទៅ ២ អង្សាសេនោះ។ ការប្រែប្រួលសីតុណ្ហភាពអប្បបរមាតិចតួចនេះ ធ្វើឲ្យមិនដឹងត្រជាក់ ឬក្តៅទេ៕
