រដ្ឋាភិបាលគ្រោងឲ្យមន្ត្រីថ្នាក់ក្រោមផ្នែកគយ និងពន្ធដារប្រកាសទ្រព្យសម្បតិ្ត
ភ្នំពេញ៖ ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង បានមានប្រសាសន៍ថា មន្រ្តីនៃអង្គភាពគយ និងពន្ធដារត្រូវបានសម្រេចឲ្យប្រកាសទ្រព្យសម្បត្តិទាំងមន្រ្តីថ្នាក់ក្រោម តែងតាំងដោយអនុក្រិត្យ។
លោក ឱម យ៉ិនទៀង បានបន្តថា ការរៀបចំដើម្បីកំណត់ឲ្យមន្រ្តីថ្នាក់ទាបជាងនាយកដ្ឋានមកពី អង្គភាពគយ និងពន្ធដារត្រូវជាប់កាតព្វកិច្ចប្រកាសទ្រព្យសម្បត្តិនេះ អាចនឹងប្រកាសឲ្យសាម៉ីខ្លួនដឹងជាមុននៅក្នុងអំឡុងពេល២ខែទៀត មុននឹងចាប់អនុវត្តសេចក្តីប្រកាសនេះនៅថ្ងៃទី១ ខែមករា ឆ្នាំ២០១៤ខាងមុខ។
លោក ឱម យ៉ិនទៀង បានឲ្យដឹងទៀតថា ការប្រកាសទ្រព្យសម្បត្តិ និងបំណុលរបស់មន្រ្តីរាជការនេះ ត្រូវធ្វើឡើងពេញមួយខែមករា ជារៀងរាល់ឆ្នាំ។ បច្ចុប្បន្នមានមន្រ្តីចំនួនជាង៦០០នាក់ ហើយដែលបានមកប្រកាសទ្រព្យសម្បត្តិ និងបំណុលចាប់តាំងពីដើមខែមករាមក ហើយការ ប្រកាសទ្រព្យសម្បត្តិ និងបំណុលលើកដំបូងបង្អស់កាលពីឆ្នាំទៅ មានមន្រ្តីជាង២ម៉ឺននាក់ បានចូលខ្លួនមកប្រកាសទ្រព្យសម្បត្តិ និងបំណុល៕
